23 一紙天地: novembre 2007

6 novembre

大家一齊打飛機，一．二．三到你!

細個，讀中學嗰時，自鳴得意，都攞過唔少海報設計獎．在同一題目下，各出奇謀，而我憑著一樽生膠．一把尺．一枝筆．一把Cutter，戰勝其他設計學院，諗下都覺得巴閉!

到現在，每逢香港4As廣告頒獎禮，總覺回到中學年代．

是夜，你會看到...大家都以平面稿作為機場，因為平，因為快，因為易搞掂．報紙又得，雜誌又得，又可以作為海報，又可以一出三，搞番個Campaign，於是大家谷盡八月，然後喺九月十四號買新報!起飛！以上幾點，充份証明四甲還是一條心，嗱嗱嗱至少創作人係啦.

另，四甲海報設計比賽，又比中學嗰時自由得多．冇統一題目，大家自由發揮．你可以左抄右抄，我可以抄十年前抄廿年前，佢又可以用同一產品(如：香薰)創出三至四個Campaigns，更更更更加可以用乜乜speaker做稿...小喇叭！吹呀?唔抵得呀? 贏咪得囉，你理得我啫?!

若果，我講若果啫，平日啲正常廣告，正常稿，大家都肯花打飛機60%嘅心血，我諗香港廣告唔會再輸畀日本．泰國，更唔會驚國內同胞嘅力量．

飛機，我都有打．但，有日，當我親戚問我近排有乜廣告出街時...我啞口無言．平日的，太差，講出嚟只會換來冷眼；飛機的，會明嗎?講了只會換來一句"未見過"．

近年，始覺人在江湖，打不打飛機，身不由己．不過，平日啲稿，我盡力做得更好．起碼，人哋問你有乜出街，你敢講！

在想，既然總要打，要參賽，何不參加世界組海報設計比賽?至少勁都勁啲，要輸都輸得服啲嘛．．．speaker小喇叭！